Баспаналарын су алып кеткен "АЗФ-1" бау-бақша ұжымы тұрғындары биліктен материалдық шығынды өтеуді талап етуде. Бір түнде далада қалған 52 отбасы қазір №47 мектеп пен туған-туыстарын паналауға мәжбүр. Бүлінген жиһаз, істен шыққан техника мен қабырғалары сөгілген үйлерін қалпына келтіруге көмек сұрап отыр."Жіңішке" өзені арнасынан тасып, 52 үй зардап шекті. 500- дей адам далада қалған болатын. Қаладағы екі мектепте эвакуациялық бекет ашылып, "АЗФ-1" тұрғындары сонда орналастырылған. Туған-туыстарын жағалап жүргендері де бар. Саяжайды 3-сәуір күні су басқан. Құжаттарымызды да алып үлгермедік, дейді тұрғындар. Шығынды есептеу үшін қалалық әкімдік жанынан жұмыс тобы құрылды. Олардың құрамында депутаттар, құтқарушылар мен әкімдік мамандары бар. Қазір 52 үйдің шығыны есептеліп жатыр. Хаттама шығарылған жоқ.
Қызыл су шайған үйлердің ішінде тұрмыстық техниканың бәрі жарамсыз. Ал баспанасыз қалғандар көпбалалы, жағдайы төмен отбасылар. Үйлердің дені несиеге салынған. Жер үйлерге 50-60 см деңгейінде су кірген. Енді жөндеу үшін қыруар қаржы керек, дейді тұрғындар. "Жіңішке" өзені маңындағы бау-бақша ұжымына инертті материалдар жеткізілді. Қала әкімі аппаратының төтенше жағдайлар бөлімі басшысы Серік Дәулетовтің мәліметінше, 25 бірлік техника 4 күннен бері су сорғылау жұмыстарын үзбей жүргізіп жатыр. Астана әкімдігі мамандарының мәліметінше, эвакуацияланған тұрғындар әзірше № 26, 47- мектептерде тұрып жатыр. Бұл мектептердің оқушылары онлайн оқу форматына көшкен. Ал зардап шеккен отбасыларға көрсетілетін көмек түрін, сомасын комиссия шешеді. Әзір шығын есептеліп жатыр.