Мектептер мен балалар бақшасында, үлкен салтанат залдарында мерекелік ертеңгіліктер өткізуге рұқсат жоқ. Бірақ өз сыныптарында шағын топ болып жаңа жылды мерекелеуге тыйым салынбайды. Бұл туралы бүгін өңірлік коммуникациялар орталығында облыстық санитарлық-эпидемиологиялық бақылау департаменті басшысының міндетін атқарушы Гүлбану Дәулетова хабарлады. Оның айтуынша, қазір тұрғындардың коронавируспен ауыру жағдайы төмендеп келеді.
Кезекті брифингте жаңа жылдық жұмыстастар отырысына қатысты сауал жолданғанмен нақты жауап берілмеді. Яғни мейрамханаларда корпоратив бола ма, жоқ па, оны ешкім білмейді. Ал мектептер мен бала-бақшада өз тобымен шағын мерекелік кештер өткізуге тыйым салынбайды. Бірақ көп қатысушы жиналатын салтанаттар өткізуге болмайды. Мұны мектеп директоры назарға алуы тиіс.
Облыста коронавирус жұқтыру деректері едәуір төмендеген. Өткен тәулікте бір ақтөбелік бұл вируспен сырқаттанған. Науқас ауруханаға жатқызылған. 11 айда 34 мың 903 өңір тұрғыны ковидпен ауырған. Бір қуантарлығы ақтөбеліктердің екпе алу қарқыны 63 %-ға орындалған. 334 мың тұрғын вакцина салдырған. Ревакцинациядан 2044 адам өткен.Вакцинаны үшінші мәрте салдыру барысында екпенің түрін өзгерту қажет болады. Мәселен екі мәрте "спутник V" ектірген тұлға "казвак", "коронавак", "хаятты" салдыра алады. Жүкті әйелдер мен жасөспірімдерге рұқсат етілген "Пфайзер" де жеткілікті. Келер жылдан бастап вакциналар ақылы болуы мүмкін. Тек Қазақстанда өндірілген "Казвак" пен "Спутник V" ғана тегін егіледі.