Қазынадан бөлінген қыруар қаражат желге ұшты. Бюджет қаражатын мақсатсыз жұмсаған Әлеуметтік кәсіпкерлік корпорациясының 16 қызметкері жауапқа тартылған. Бүгін облыстық қоғамдық кеңес мүшелері халыққа пайдасынан гөрі зияны тиіп отырған корпорация басшылығын сынға алды. Өткен жылы сауда орындарына шіріген картоп шығарып, сынға қалған "Ақтөбе" Әлеуметтік- кәсіпкерлік корпарациясының" жұмысы биылғы жылы да мардымаған. Бүгін қоғамдық кеңестің отырысы осы мекеменің ісін талқылауға арналды.
Жемқорлыққа қарсы күрес қызметі ақпан мен сәуір айларында "Ақтөбе" Әлеуметтік- кәсіпкерлік корпорациясына" толық тексеру жүргізген. Тексеру нәтижесінде мекеме тарапынан жемқорлыққа жол беріліп, миллиондаған қазына қаражаты талан-таражға түскені белгілі болды. Жұмысына салғырттық танатқан корпорацияның 16 қызметкері үстінен әкімшілік , қылмыстық іс қозғалып, тергеу әлі жалғасуда. Қоғамдық кеңес отырысында "Халық сауда" әлеуметтік дүкен желілерінің жабылу мәселесі де сөз болды. Қоғамдық кеңес мүшелері тексеру жүргізген кезде облыс орталығында арзан бағамен азық-түлік сататын сауда орындарының саны онға жетпейтін болып шыққан. Бірақ "Ақтөбе" Әлеуметтік- кәсіпкерлік корпорациясының" өкілі кеңес мүшелерінің пікірімен келіспейтінін жеткізді. Облыстық жемқорлыққа қарсы күрес департаменті тарапынан жүргізілген тексеру нәтижесінде корпорация филиалы миллиондаған қаражатты мақсатсыз жұмсағандығы анықталды. Коммуналдық шығындар әлденеше есе асып кеткен, қызметкерлерге де негізсіз сияқылар тағайындалған. Ең бастысы бағаны тұрақтандыру қорының ақшасы қолды болған.