Бүгін қасиетті Рамазан айы басталды. Ораза ұстауға бекінген барша мұсылман халқы таң сәріде ауыздарын бекітті. Бүгін орталық мешітке ағылған адам қарасы көп. Жұртшылық қасиетті айдың алғашқы күнінде өлі аруақтардың рухына құран бағыштап, Алладан бас амандығын сұрады. Мешітке келгендердің барлығы бірдей ораза ұстайтындар емес. Ауыз бекітіп, намаз оқымаса да, пітір садақа салып, іштей тілек тілейді тұрғындар. Елдің Бас мүфтиі Әбсаттар қажы Дербісәлі бүгін барша мұсылмандарды қасиетті Рамазан айының басталуымен құттықтады. Әбсаттар қажы халықты рақымшылыққа үндеп, кәсіпкерлерді жоқ-жітіктерге көмектесуге шақырды. Ақтөбедегі "Нұр ғасыр" орталық мешітінің басшылығы да ақтөбелік жамағатты мүмкіндігінше мұқтаж жандарға жәрдемдесуге үндеді. Рамазан айындағы сауап пен күнәлар еселеніп жазылады. Хадисте: "Осы айда бір күнә істеген адам екі азап алады. Ал бір жақсылық жасаған адам екі сауап алады",- делінген. Өзі ораза тұтпаса да, ауыз бекіткен адамды қонақ қылған адам мол сауапқа кенеледі. Ораза кезінде "Нұр ғасыр" мешітінің асханасында ауызашар кештері өтеді. Ауызашарды өз қаражатына жасағысы келетін ақтөбеліктерге мешіт асханасының есігі ашық.