Қазақстанда ет өндірудің көлемі біршама артты. Статистикалық мәліметтер елімізде ет қана емес сүт өнімдерін шығарушылардың да жұмыс көлемі айтарлықтай өскенін растайды. Қаңтар -ақпан айларына жасалған сараптама бойынша Қазақстанда ет өндірісінің 5,2 пайызға өскендігін байқауға болады. Ет өнімдеріне консервіленген, бұқтырылған ет өнімдерімен қатар саудаға шығарылған мал еті жатады. Ет өнімдерінің бағасы да жыл басында көтеріліп кеткені белгілі. Сондықтан, кейбір сарапшылар егер сұраныс толық қанағаттандырылса, баға түсуі де мүмкін деп отыр.
Қала базарларында қаңтар айының басында орта есеппен еттің келісі 20 пайызға дейін қымбаттаған екен. Мұны ауа райының қолайсыздығына байланысты шалғай аудандардан ет жеткізу қиынға соғып, баға көтеріліп кетті деп түсіндіргендер де болды. Ал, ет сатушылар соңғы айда баға тұрақталды деп отыр. Қала базарларында жылқы етінің келісі 3 мың теңгеден асса, сиыр еті де 2000-2500 теңгеден сатылуда. Көктемде пышаққа ілінетін мал аз болса да, ет қоры жеткілікті дейді базар басшылары. Наурыз мерекесі қарсаңында сұраныс та артқан. Базарда ет саудасы қызып тұр. Еліміз бойынша қаңтар-ақпан айларында 56 мың тонна ет өнімдері нарыққа шыққан. Бұл көрсеткіш өнім шығарудың 5,2 пайызға артқандығын көрсетеді.