Бүгін облыс басшысы Оңдасын Оразалиннің қатысуымен аймақ жастарының кеңесі өтті. Жастар кеңесіне шақырту алған бойда облыстың жаңа басшысы Оңдасын Оразалин жиын өтетін жердің мекен-жайын өзгертуді сұраған. Галстук тағып, ресми жиынға сақадай сай келетін жастарға өңір басшысы емін-еркін әңгімелесуді ұсынды. Кеңесте жас буынның тұрақты жұмысқа орналасу секілді өзекті мәселелері талқыға түсетін болғандықтан бұл жиын Мұнай өнеркәсібі зауытында өтті. Облыс әкімі болашақ мамандардың өңірдегі өндіріс орындарын аралап көргендері дұрыс деп есептейді.
Жиында белсенділер - жастар саясатын жүзеге асыру, соның ішінде жас буынды тұрақты жұмыспен мен баспанамен қамту мәселелерін көтеріп, кеңінен талқылады. Жұмыспен қамтудың бір шешімі ретінде кеңесте өңірдегі 5 жоғары оқу орны мен ірі компаниялар арасында 5 меморандумға қол қойылды. Меморандум аясында жас мамандар келісілген кәсіпорындарда өндірістік тәжірибеден өтіп, алдағы уақытта мамандығы бойынша жұмысқа орналасуға мүмкіндік алады. Сонымен қатар, облыс басшысы 50 жас маманға жаңа пәтердің кілтін табыс етті. Пәтерге ие болғандар 20 мен 29 жас аралығындағы қыз-жігіттер. Баспанаға барлығы "Жастар" бағдарламасы аясында ие болды. Олардың дені бірнеше жыл бойы пәтер жалдап жүрген жас мамандар. "Жастар" бағдарламасы аясында өңірдегі 150 жас маман пәтерге ие болмақ. Олардың бірінші легі қоныс тойларын тойлап үлгерді. Бірі бүгін кілттерін алды. Енді 50 жас кезекте тұр.