Ауа райының күрт өзгеруіне байланысты кеше түс ауа Хромтау-Никельтау-Бадамша тас жолының 45 шақырымы жабылып барлық көлік түрлерінің қозғалысына шектеу қойылды. Бұдан басқа бүгін таңертең Қарабұтақ - Комсомол-Қостанай облысының шекарасы және Қадыағаш-Ембі-Шалқар-Ырғыз күре жолы жабылды. Осыған байланысты төтенше жағдайлар департаменті қала тұрғындары мен қонақтарынан алыс жолдан бас тартуды сұрайды. "Қазгидромет" орталығының мәлімдеуінше бүгін қаламыздың кей жерлерінде қар жауып бұрқасын болады. Сондай-ақ облысымыздың бірқатар аудандарында қатты дауыл тұрып, желдің екпіні секундына 20 метрге дейін жетуі мүмкін деген болжам бар. Ауа райының қолайсыздығы әуе көліктерінің қозғалыстарына да әсер етуде. Атап айтар болсақ бүгін Астана-Ақтөбе бағытындағы әуе рейсі 15 сағат 35 минутқа, Алматы-Ақтөбе бағыты 9 сағат 10 минутқа кешіктірілді.