Жылқының ұлттық құндылықтарымыздың арасында орны бір төбе. Қобыландының - Тайбурылы, Ер Тарғынның - Бозтарланы, Қамбар батырдың - Қарақасқасы, Төлегеннің - Бозжорғасы, Ақан серінің - Құлагерінен қалған тұяқтардың санын көбейту және ата-баба аманат еткен жылқыны асылдандыру бізге міндет. Кеш болса да Ақтөбе өңірінде осы іспен айналысып жатқан азаматтар бар. Жергілікті биліктің де соңғы уақытта ат спортына көрсетіп жатқан қолдауы жаман емес. Қала сыртындағы иппадром жанынан салынған ұлттық спорт түрлері бойынша үлкен кешен соның айғағы. Ипподром әзірге жеке меншікте. Соған қарамастан жаз және күз айларында облыс әкімі, қала әкімінің кубоктері үшін ат жарысы, аламан бәйгелер өтіп тұрады. Алаңды облыстық ат спорты мектебінің иелігіне беру мәселесі қаралып жатыр дейді облыстық спорт басқармасының басшысы Асылбек Құлмағамбетов. Ол уақытта ипподромның ішкі, сыртқы келбеті қалыпқа келтіріледі. Ал жаңа ғимаратқа жақында көшкен ат спорты мектебі Ақтөбеде 2005-ші жылдан бері бар. Нысанның әлеуметтік іспен айналысып жатқанын да айтпай кетуге болмас. Осы манежде әр демалыс күндері мүмкіндігі шектеулі балалар атқа отырады. Атқа салт мініп жүру, мүгедек балалардың денсаулығын түзеуге бағытталған терапияның бір түрі. Сондай-ақ мектеп былайғы балалар үшін сабақты тегін жүргізеді. Кім-кімге де есік ашық. Облыстық ат спорты мектебіндегі аттардың тұқымы көп те емес. Бірен-саран ағылшын тұқымды бәйгеге қосатын жүйріктер бар. Көшім тұқымды тұяқтылар да азын аулақ. Қалғаны көкпарға салып жүрген өзіміздің төзімді қазақы-жабы аттар. Келер жылы ат спорты мектебіне жылқылар сатып алу жоспарда бар. Қаражат бөлінген. Республикалық көкпар чемпионатында жетістікке жетуді мақсат тұтатын облыстық құрамаға қосымша жабы аттар қажет. Пырақтарды жаратуда кенже қалып келген Ақтөбе өңірінің атбегілері жаңа жылқы жылынан осылайша істеріне сәттілік күтеді. «Жылқы жылы-жұтсыз» деп бабалардан қалған сөз бар. Қазақтың жыл санауында жылқы жылы жетінші келеді екен. Киелі «жеті» саны мен киелі жануарымыз Қазақстан үшін құтты жыл болғай ендеше. Жаңа жылыңызбен!