Ұстазға мың тағзым. Бүгін ұстаздар мерекесі қарсаңында 50-ге жуық ардагер педагогқа құрмет көрсетілді. Қаладағы мейрамханалардың бірінде дастархан басына жиналған аяулы ұстаздар концерт көріп, бір-бірімен шүйіркелесті. Үстел басында әдемі әңгіме құрған ұстаздарды қала басшысының орынбасары мен қалалық білім бөлімінің басшысы құттықтады. 50 ардагерге бағалы сыйлықтар, гүл табысталды. Мерекелік шараның басты ұйымдастырушысы халықаралық ғылымдар, экология, инженерия және падагогика академиясы ұлағатты ұстаздарға арнайы сый-сияпаттарын ұсынды.
Қазір қала мектептерінде 13 мыңға жуық ардагер ұстаз еңбек етіп жүр. Араларында зейнет жасына шықса да әлі күнге сабақ беріп жүргендері бар. Қалалық білім бөлімінің басшысы Саян Сүлейменовтің айтуынша, тәжірибесі жоғары ұстаздар қашан да сұраныста. Мұндай педагогтар жас ұстаздармен бірдей қазіргі заманғы технологияларды меңгеріп алған. Техника саласында жастармен иық тіресіп жұмыс жасап жүр. Шара соңында мерекелері қарсаңында өздерін ұмытпай құрмет көрсеткен ізбасарларына ардагер ұстаздар алғыс білдірді.