Қалың қар әбігерге салды
Толассыз жауған қардан Ақтөбе ақ тауға айналды. Соңғы 3 тәулікте жауған қардың ең көп мөлшері облыс орталығында. Шаһарға 44 миллиметр ақ ұлпа түскен. Казгидрометтің болжамынша, ақпанда 10-27 миллиметрге дейін қар түсуі ықтимал. Дегенмен, қыс қыңырлығын көрсетіп, тұрғындарға тосын сый жасады. Ақтөбе қар құрсауында қалды. Тұрғындар қолайсыз жағдайға тап болды. Жолдар жабылып, көлік пен жаяу жүргіншілер жүруден қалды. Аялдама автобус тоқтай алмай, жолаушылар жолдан түсіп жатты.Коммуналдық қызметкерлер тынымсыз жұмыс істеп жатыр. Қар тазалау жұмыстарына екі тәулікте 350-ге жуық техника мен 500-ден астам жол жұмысшысы жұмылдырылған. Олар екі ауысымда қызмет етуде. Қалың қардан қаланы бір мезетте аршу мүмкін емес, әрине. Қарлы боран түк көрсетпей, коммуналдық қызметкерлердің жұмысына кедергі келтірді. Кеше күн ашылды. Алайда, қалың қардан қаланы тазартып үлгермей жатыр. Өткен түнде және бүгін күндізгі ауысымда қар аршуға 400-ден астам адам мен 200-ден көп арнайы техника кірісті. Шаһар басшысы Азамат Бекет қала орталығы мен тұрғындар алабын аралап көрді.
Қалаға қарасты 54 тұрғын алабы да ақ ұлпадан аршылып жатыр. Автобус жүретін негізгі көшелер, елді мекендерге кіреберіс жолдар арнайы техникамен тазартылған. Алайда, Ақжар, Шанхай, Мәскеу, тұрғындары көлікпен үйлеріне жете алмай әлек болды. Ол аудандарға жауапты "Финансиал Уорд", "Ақжол ЛТД", "Коквест" мердігер мекемелерінің басшыларын қала әкімі кеше түнде қардан шұғыл тазартуға міндеттеді.
Ал, тұрғындар үйлерінің алдын өздері аршып жатыр. Қардың көптігінен көшенің арғы беті көрінбейді. Жеке секторлардың көлік жолын ғана арнайы техника тазартып кеткен. Тұрғындар оған да риза. Қыс бойы үйлердің алдынан қар алынбаған. Енді тазартуға кірісетін шығар дейді ақтөбеліктер.
Ережелерге сәйкес, кептелісті болдырмау үшін көлік өте көп жүретін, қоғамдық көлік жолдары тазартылады дейді жауапты мамандар. Орташа қарқындылықтағы учаскелер, яғни алаңдар, тротуарлар, әлеуметтік нысандарға кірме жолдар қардан аршылады. Содан кейін ғана екінші деңгейлі көшелер тазартылып, қаладан қар шығару жұмыстары басталады. Ал, аула аумақтарын пәтер иелері кооперативі төрағалары тұрғындармен бірігіп қардан аршылуы тиіс.
Количество показов: 111
Дата создания: 25.02.2025 05:37:08