Қаланы санитарлық тазалау жұмыстарына аудан әкімдері жауап береді. "Астана" ауданы 7 учаскеге бөлінген. Бұл учаскелерде 5 мердігер мекеме жұмыс істейді. Қазіргі таңда аталған ауданды қардан тазалау жұмыстарына 12 техника және 140 адам жұмылдырылған. Қазіргі таңда 63 бірлік мамандандырылған техника қала аумағын қардан тазартуда. Шаһарда соңғы аптада бір жарым айлық мөлшерден көп қар жауды. Қарды аршу және полигондарға шығару жұмыстарына 11 мердігер компанияның 200-ге жуық техникасы жұмылдырылды. Осы жұмысқа қосымша тартылған 60-тан астам техника екі күн ішінде белгіленген аумақтардан қар шығарып, қаланы толығымен қардан тазартатын болады.
Қаладағы орталық көшелерде көлік қозғалысының және жаяу жүргіншілердің көп болуына байланысты алдымен осы аймақтар қардан тазартылуда. Одан бөлек, аялдамалар, тротуарлар мен көше қиылыстарында да мұзы ойылып, қары аршылуда. Бұл туралы "Астана" ауданы әкімінің орынбасары Алмас Жақсылықов мәлімдеді.
Өткен демалыс күндері автомобиль жолдарына инертті материал себілмеді. Себебі, екі күннен бері қар тоқтаусыз жауып тұрғандықтан, басты мақсат көшелерді тазалау болды, дейді әкімдік өкілі.