Қала жылыту маусымына дайындықты аяқтауға жақын. Былтыр жылу құбырларынан бірнеше рет ақау шыққан Әуеқалашығы ауданында желілерге жөндеу жұмыстары толықтай жүргізілген. Аталған ауданда жылу қазандығы да жаңартылды. Есет батыр ауданының кейбір бөліктерінде жылу құбырлары ауыстырылған. Бұл туралы бүгін облыс әкімдігінің ашық алаңында өткен баспасөз өкілдерімен жүздесуде қалабасы Асхат Шахаров мәлімдеді. Сондай-ақ, биыл суағарларды тазарту жұмыстарына 144 млн теңге бөлініп отыр. Облыс әкімдігіндегі ашық алаңда облыс және қалабасы, бірқатар басқармалардың басшылары тілшілер тарапынан қойылған сұрақтарға жауап беріп, түйткілді мәселелерді ортаға салды. Биыл қала жылыту маусымына дайындықты ерте аяқтауды көздеген. Ақау табылған құбырлар қыркүйекке дейін жөнделіп бітуі тиіс. Оған қазынадан жеткілікті қаражат бөлінген. Жаңа саналатын Есет батыр, Батыс-2 аудандарының өзінде желілерді алмастыру жұмыстары жүргізіліп жатыр. Жаңбыр жауса бізде көлік жолдары су астында қалады. Ақтөбенің бұл проблемасын шешер күн де алыс емес секілді. Қалабасы Асхат Шахаров өзекті мәселені күн тәртібінен алу үшін суағарлар санын, шақырымын көбейту жұмыстары жүргізіліп жатыр деп отыр. Жаңа аудандарда үй тұрғызылса, арықтар салу міндеттеледі. Жыл соңына дейін өңірде 90 көп қабатты үй пайдалануға берілмек. 12 үйдің құрылысы кешеуілдеп қалған.
Сондай-ақ, ашық алаңда дүкен сөрелерінде кейде күрт жоғалып кететін қанттың жәйі қозғалды. Облыстық кәсіпкерлік басшысы Нұрхан Тілеумұратов өткен айда өңірге 60 вагон шекердің жеткізілгенін жеткізді. Тамызда осынша қант тағы келуі керек. Ақ ұнтақ Тараз, Көксу қант зауыттарынан сатып алынуда. Шекті бағасы әлеуметтік дүкендерде келісіне 363 теңге болып белгіленген. Ал өзге дүкендерде келісі 471 - 483 теңге аралығында. Тұрақтандыру қорына шекерден бөлек қазір көкөністер түсіп жатыр. Пияз, қырыққабат, сәбіз оңтүстік өңірлерден тасымалдануда. Ал картоп жергілікті бақша өнімдерін өсіретін шаруашылықтардан күз айлары басталысымен қабылдана бастайды.