Есірткі қылмысы өршіп тұр. Осы аптада қалада 2 бірдей есірткі қылмысы әшкереленді. 30 жастағы ақтөбелік азаматтың балконынан 2 келіге жуық есірткі табылды. Ол көршісінің қырағылығы арқасында полицияның қолына түсті. Күдікті қазір тергеліп жатыр. Ол: өсімдік тектес, өткір иісті жасыл затты бос қалған саяжайлардан өзіне пайдалану үшін теріп алғанын айтып ақталып отыр.
Темір тұлпарды тізгіндеген әлдебіреу жол үстінде жылдамдықты асырғаны үшін полиция қызметкерлерінің назарына ілігеді. Жүргізушіден күмәнданған тәртіп сақшылары көлікті тоқтатып, тексере бастайды. Ақырында азамат өз қылмысын мойындап, әлгі жерде 1 келіге тарта есірткіні заң өкілдеріне тапсырады. Күдікті Ибатов көшесінің бойындағы көп қабатты үйлердің бірінің тұрғыны болып шықты. Жыл басынан бері есірткі бизнесіне қарсы күрес басқармасының қызметкерлері бас-аяғы 116 келі марихуана есірткісін тәркілеген. Және есірткі өндірудің 20 дерегі анықталған.