Алға қаласында газ құю бекетінде болған жарылыстың себебі әзір белгісіз. Алдын ала болжам бойынша, стансада техникалық ақаулар болуы мүмкін. Қазір тергеу-тексеру амалдары жүргізіліп жатыр. Келтірілген шығын мөлшері де анықталуда. Кеше сағат 7- лер шамасында Алғадағы Абай көшесінде орналасқан "Лимангаз" газ құю стансасында жарылыс болды. Салдарынан бекет толықтай өртеніп кетті. "Тайота камри" автокөлігі, 1 автотехника мен ауданы 22 шаршы метр операторлық ғимарат күлге айналған. Абырой болғанда зардап шеккендер жоқ. Өрт басталғанда жұмысшылар сыртқа шығып үлгерген.
Төтенше жағдайды жоюға 7 арнайы техника мен 26 құтқарушы жұмылдырылған. Ал газ құю стансасы түгі қалмай жанып кеткен. Жанар-жағармай бекетінің орны күлге айналды. Абырой болғанда, бұл маңда тұрғын үй жоқ,-дейді мамандар. Өртті сөндіруге екі сағаттай уақыт кеткен. Ақтөбеде аптап ыстық басталғалы суға бату дерегі жиіледі. Құтқарушылар осылай деп дабыл қағуда. Тағы бір қайғылы жағдай сенбі күні, Хромтау ауданы, Қызылсу ауылдық округы, Сарсай ауылы маңындағы Александровка су қоймасында тіркелді. Сүңгуірлер 31 жастағы ер адамның денесін 6 метр тереңдіктен алып шыққан. Ол тыйым салынған жерге суға түскен. Құтқарушылар суға тек рұқсат етілген жерлерге түсу керектігін еске салады. Әуелі шомылатын орынның тереңдігін анықтаған жөн. Қараңғы уақытта, сондай-ақ масайған күйде суға түсуге болмайды.