Бүгін қаламызға қазақ ғарышкері, ұшқыш, ҚР Ұлттық ғарыш агенттігінің төрағасы Талғат Мұсабаев келді. Мәртебелі мейман Достық үйінде ақтөбелік жастармен кездесті. Жастар алдында Елбасының биылғы жолдауындағы ғарыш саласын дамытуға қатысты берілген тапсырмалары мен олардың орындалуы жөнінде баяндама оқыды. Мәселен, елдің индустияландыру картасына қазақ ғарыш саласына қатысты 4 жоба енген. Олар: «ҚазСат» байланыс және ақпарат тарату, жерді қашықтықтан зондтаудың ғарыштық жүйелерін құру, «Байқоңыр» ғарыш айлағында Бәйтерек ғарыш-зымыран кешенін және ғарыш аппараттарын құрастыру-сынау кешенін жасақтау. Бұл кездесуден кейін Талғат Мұсабаев Талғат Бигельдинов атындағы әуе қорғанысы күштері әскери институты мен Назарбаев зияткерлік мектебіне барды.