Бүгін Ақтөбеде турникке тартылудан «Tartyl Fest» республикалық фестивалі өтті. Оған қатысуға 500-ге жуық үміткер өтініш білдірген. Турникке тартылудан бәсеке Тұңғыш Президент атындағы орталық саябақта өтті. Республикалық «DARA» дарындыларды қолдау қоры ұйымдастырған сайыстың жүлде қоры қомақты. 1-орын үшін 200 мың теңге, 2-орын 100 мың теңге, 3-орынға 50 мың теңге. Жеңімпаздар 8 қыркүйек күні елордада өтетін финалға жолдама алды. «DARA» дарындыларды қолдау қоры мұрындық болған спорт фестиваліне жаппай қатысуға ақтөбеліктер аса белсенділік танытпады. Қордың сайтында жарысқа келу үшін онлайн өтінімдерді 500-ге жуық адам толтырған. Мәселен, Шымкент қаласында өткен іріктеу сайысына 2 мың адам қатысқан. Әрі турникке тартылушылардың дені ерікті жастар. Араларында 14-17 жастағы бозбалалар да бар. Сайыс ұйымдастырушылары Ақтөбені 11-ші қала ретінде таңдаған. Қонаев қаласынан бастау алып, Түркістанда, Талдықорған, Алматы, Тараз, Шымкент, Ақтау, Қызылорда, Атырау қалаларында жалғасын тапқан. Әзірге турникке тартылудан рекордтық көрсеткіш Ақтау қаласында тіркелген. Турникте еш қиналмай 44 рет тартылған Дамир есімді маңғыстаулық жігіт гранд финал жүлдесінен үмітті. Елордада өтетін ақтық мәренің жеңімпазы 3 млн теңге ақшалай сыйақы алады.
Ал «Tartyl Fest» республикалық фестивалінің жеңімпазы әлемдік сайыста бағын сынайды. Биыл күз айында Финляндия елінде өтетін чемпионатқа үш жолдама сарапқа салынатын болады.