Конфессияаралық келісімнің Қазақстандық моделі қалыптасып келеді. Жаңа модель еліміздің татулықты, тыныштықты, келісім мен бейбітшілікті қалайтынын көрсетеді. Дін дегеніміз нағыз мәдениет екендігін Қазақстан өз жерінде өткізген "Әлемдік және дәстүрлі діндер көшбасшыларының VII-ші съезінде" де көрсете алған. Бұл туралы бүгін Ақтөбеде өтіп жатқан діни тақырыптағы батыс өңірлік үлкен форумда айтылды. Жиынға Атырау, Маңғыстау, Батыс Қазақстан өңірлерінен діни бірлестіктер мүшелері мен зиялы қауым өкілдері келген. Ислам дінінде мұсылманның өзгемен ренжісуі, араздасуы шариғатқа жат. Қазақта да "Басқаға пайдаңды тигізбесең, кесіріңді келтірме" деген сөз бар. Мұны әрбір қазақ құлағына жастайынан құйып өскені анық. Ақтөбе жерінде өтіп жатқан "Конфессияаралық келісімнің қазақстандық моделі" тақырыбындағы үлкен форумға жиналғандар осы төңірегінде әңгімелесті. Кең байтақ жерімізде тату-тәтті тұрып жатқан халықтар достығын сөз етті. Елімізде 125 ұлт өкілі қазақтың көк туы астында өмір сүруде.
Жиын барысында қыркүйек айында Қазақстан өз жерінде өткізген "Әлемдік және дәстүрлі діндер көшбасшыларының VII-ші съезінде" көтерілген маңызды мәселелер талқыланды. Діни бірлестіктер арасындағы қатынасты күшейту, қоғамның бейбіт өмір сүруін қамтамасыз ету талқыланды. Әсіресе әлеуметтік желідегі ашықтан-ашық қозғалып жүрген дін тақырыбына абай болу қажеттігі ескертілді. Дін тақырыбында жазатын, сөйлейтіндердің парақшалары бақыланады. Қазақстанның ұраны- татулық, береке-бірлік, тыныштық. Біздің ел келісім мен бейбітшілікте өмір сүргенді қалайды. Тәуелсіз елдің туы астында өмір сүріп жатқан ұлттар мұны жақсы білуі тиіс. Қазақстан ұстанатын ислам діні дауласқанды жарастырғанды құп көреді. Бір-біріңе көмектесіп өмір сүрген әрдайым ынтымақта болады деп есептейді. Бұл құран аяттарында да жазылып қойылған. Форумға Атырау, Ақтау, Орал қалаларынан келген діни бірлестіктер өкілдері де қатысты. Ақтөбе және Қызылорда Епархиясының епископы Игорь Сидоренко, "Өмір бұлағы" христиандық- інжілдік елуліктер шіркеуінің басшысы Айдар Еспаев православтық шіркеулердің жұмысы тақырыбында әңгімелер қозғады. Форум соңында қатысушыларға Ақтөбе облысының діни бірлестіктері мен діни ғимараттары туралы жазылған кітапша таратылды.