Бүгін "SCAT" және "Qazaq air" әуекомпаниялары Ақтөбеге рейстерді тоқтатты. Бұған дейін "Air Astana" да барлық рейстерді доғарған болатын. Себебі, Әлия Молдағұлова атындағы халықаралық әуежай жөндеу жұмыстарына жабылады. Алдын ала сатып алынған билеттердің ақшасы жолаушыларға 100 пайыз кері қайтарылады.
Алдын ала мәлімет бойынша әуежай қызметі 10 күнге тоқтатылады. Осы аралықта әуе айлағында плиталарды ауыстыру жұмыстары жүргізіледі. Себебі, еліміздің Азаматтық авиация комитеті әуежайдың ұшу-қону алаңын тексерістен өткізіп, бірнеше ақаулықтарды анықтаған. Әуежайдағы жөндеу жұмыстары әлдеқашан басталып кеткен еді. Тек бұған дейін рейстер түнгі уақытта жүзеге асырылып келді. Енді бүгіннен бастап 27-наурызға дейін әуежай қызмет көрсетуді тоқтатады.
Ақтөбе әуежайының жабылуына байланысты еліміздің әуе компаниялары рейстерді тоқтатып жатыр. Бұрынырақ "Air Astana" Ақтөбеге рейстерді тоқтататынын хабарлаған болатын. Бүгін тағы екі компания - "SCAT" және "Qazaq Air" Ақтөбеден Нұр-Сұлтан, Алматы, Атырау, Түркістан бағыттарына рейстерді доғарды. Жолаушылар сатып алған жерінен билет құнын толықтай қайтара алады. Немесе рейсті басқа күнге қайта брондауға да болады. Атап өтейік, Ақтөбе әуежайынан аптасына 5 бағыт бойынша 52 ішкі рейс, сондай-ақ басқа елдердің төрт қаласына аптасына 9 рейс орындалып жүр.