"Ақтөбе-Мақат" бағытында жаңа жылға дейін көлік қозғалысы жанданады. Республикалық маңызға ие тас жолды қайта жарақтандыру жұмыстарына жауапты жергілікті мекеме басшылары өңірімізге келіп кеткен премьер -министр Асқар Маминге осылай деп уәде берген. Енді жұмысшылар күні-түні тер төгуде. 24-қазанда Темір ауданына жұмыс сапарымен барған аймақ басшысы Оңдасын Оразалин "Ақтөбе - Қандыағаш" тас жолын қайта жарақтандыру барысын қарап шықты."Нұрлы жол" мемлекеттік бағдарламасы шеңберінде қайта жарақтандырылуы тиіс "Ақтөбе-Қандыағаш" жолының ұзындығы 100 шақырымды құрайды. Жөндеу жұмыстарымен 2 мердігер компания айналысуда. Тас жолдың 11-ші шақырымынан 52-ші шақырымына дейінгі аралықта "«СинеМидасСтрой " серіктестігі жұмыс жасап жатыр. 52-ден 100-ші шақырымға дейінгі бөлікті қалыпқа келтіру жергілікті "Ассанадорстрой" мекемесі міндетінде.
"Ақтөбе-Қандыағаш" 1-санатты тас жол. 4 жолақты, 2 бағытты болады. Жол бөлігін жарықтандыру да жобаға енгізілген. Жобаны жүзеге асыру 2023 жылға дейін жалғасып, 18 көпір мен 66 су өткізетін құбырлар қалпына келтіріліп, салынады. Бұдан өзге, Ақкемер ауылының жанынан жергілікті тұрғындардың өтінішімен мал айдайтын малөткел салынды, бұл жобада қарастырылмаған, деді Марат Махамбетов. Одан бөлек қазір облыс көлемінде бірқатар бағыттарда жол жөндеу жұмыстары жүргізіліп жатыр. "Ақтөбе-Мақат" 2-ші санатты жолдың бір жақ бөлігінде асфальт жабындысы төселіп, Атыраумен екі ортада көлік қозғалысы қысқа дейін жанданады. Екі өңір арасындағы жолды қалыпқа келтіру жобасын Азия даму банкі қаржыландырды. Ақтөбеден Қандыағашқа дейінгі бөлікте 1000-нан аса адам жұмыс жасап жатыр. Еңбекке облыс орталығы, Алға, Мұғалжар аудандарының тұрғындары тартылған. Барлығы 600 бірлік техника жұмылдырылды. Облыс әкімі жұмыстардың жоғары сапасын қамтамасыз ету және оларды іске асыру мерзімдерін сақтау бойынша бірқатар тапсырмалар берді.