Ақпанда бензин мен сұйлытылған газ қымбаттайды

Ақпаннан бастап елде мұнай өнімдерінің бағасы артады. Оның ішінде жанар май мен сұйылтылған газ да бар. Бұл туралы Энергетика министрі Алмасадам Сәтқалиев мәлімдеді. Баға бірден көтерілмейді. Кезең-кезеңімен өсуі мүмкін. "Бензин бағасының нақты қаншаға және қаншалықты жиі өсетінін айту қиын. Алайда баға біртіндеп көтеріледі. Бұл жерде нақты алгоритм жоқ: мүмкін аптасына бір рет, мүмкін айына бір рет өседі. Бұл біздің келіссөздерімізге, сарапшылармен және нарық қатысушыларымен жүргізілетін талқылауларға байланысты болады", - делінген министрдің мәлімдемесінде. Ақтөбеліктер бұл жаңалыққа наразы. Онсызда жетісіп отырмаған халық ең болмаса жалақы өсіп, жұмыссыздық азайса, дейді. Энергетика министрі елдегі бензин бағасын көрші Ресейдегі бағамен салыстырды. Сәтқалиевтің сөзінше, қазір елде АИ-92 маркалы бензиннің реттелген максималды бағасы - 205 теңге. Егер бағаны ырықтандырып, таза нарықтық механизмдерге көшетін болсақ, оның ең аз дегенде көршілес нарықтардағы бағамен теңесетіні анық. Мысалы, Ресейде бензин бағасы шамамен бір литрге 290-300 теңге аралығында. Ал, Қазақстанда енді бензин мен дизель отынының бағасы мемлекет тарапынан реттелмейді.
Количество показов: 332
Дата создания: 30.01.2025 08:02:55