Еліміздің бас санитар дәрігері шығарған жаңа қаулы бойынша енді 60 жастан асқандар да ревакцинациядан өтетін болады. Облыстық денсаулық сақтау басқармасының басшылары олар егілетін Пфайзер вакцинасы жеткілікті деп отыр. Қазірден бастап екпе салдырып жатқан тұрғындар да бар. Еліміздің бас санитар дәрігері бекіткен қаулы келесі аптаға дейін толықтай күшіне енеді. Бұл құжат бойынша енді жасы 60 тан асқандарға ревакцинация кезінде америкалық "Пфайзер" екпесі салынатын болады. Облыстық денсаулық сақтау басқармасының өкілдері облыста "Пфайзер" вакцинасы жеткілікті көлемде сатып алынғанын айтып отыр.
Өткен жылдың ақпан айынан бастап облысқа 1 миллионнан астам доза вакцина жеткізілген. 377204 адам короновирус індетіне қарсы әртүрлі вакциналардың бірінші компонентімен егілген. Вакцинаның екінші компонентін алғандар саны да осы шамалас. Жалпы облыс тұрғындарының 71 пайызы вакцина алды. Сондай-ақ күз айларынан бері 32 мыңнан астам адам ревакцинацияланыпты. Облыста 2 мыңнан астам жас босанған келіншек, емізулі баласы бар жас аналар "Пфайзер" вакинасына егілген. Ал 16-18 жас аралығындағы 4582 жасөспірімге де дәл осы вакцина салынған. Ал, "Пфайзер" вакцинасының екінші компонентін алып үлгерген балаларды ревакцинациядан өткізу туралы нақты шешім әлі қабылданған жоқ.