Тұңғыш Президент күні Құрашасай елді мекенінде жаңа білім ошағының есігі айқара ашылды. Ауыл балалары ұзақ жылдар күткен жаңа мектептің табалдырығын аттады. Бұған дейін жергілікті билікке бірнеше мәрте сұраныс түсірген ата-аналардың қуанышында шек болмады. Жайлы орынға көшкендеріне мұғалімдер де дән риза. Екі қатарлы еңсесі биік су жаңа ғимарат алыстан мен мұндалайды. Жол бойында орналасқан. Қай тұсынан болса да қатынауға жеңіл. Құрашасай елді мекенінің «Болашақ» ықшам ауданынан орын тепкен. Жалпы көлемі 1,6 гектар жерді алып жатыр. Құрылысты былтыр бастаған «АктюбЭлектрСетьСтрой» ЖШС басшылығы бұл міндетті абыроймен аяқтап, нысанның кілтін мектептің директоры Төлеген Құсниязовқа табыстады. Мектепке бір ауысымда 150 оқушы білім алады. Бірақ, Құрашасайда оқушылардың саны 260. Сондықтан сабақ екі ауысымда өтетін болады. Ең бастысы жаңа мектепте оқушыларға жаңа мүмкіндіктер ашылды. Әр пәннің өз кабинеті бар. Химия, физикадан зертханада талдаулар жасап, еңбек пәнін шеберханада өткізетін болады. Спорт залы болашақ спортшылардың қанатын бекітеді. Бұдан бөтен 60 орынға есептелген асхана мен 77 орындық мәжіліс залы бар. Балалармен бірге ата-аналардың да көңілі көтеріңкі. Бұдан былай мектепте оқып жатқан балалары үшін алаңдамайтын болды. Бұл күнді бүкіл ауыл ұзақ күткен еді. Мектеп ауласында футбол, волейбол, баскетбол, теннис алаңдары бар. Жаттығу жасайтын аумақ пен жүгіру жолы да қарыстырылған. Мекеменің дербес жылыту қазандығы бар. Көгілдір отынға қосылған.