Бүгін таңғы 6 шамасында 312-ші атқыштар дивизиясы даңғылы бойында ірі жол апаты болды. Үш көлік соқтығысып, біреуі жанып кеткен. 3 адам түрлі жарақаттармен облыстық жедел жәрдем ауруханасына жеткізілді. Біреуінің жағдайы ауыр. Облыстық полиция департаменті баспасөз қызметінің жетекшісі Ерболат Сарқұловтың мәлімдеуінше, 312-ші атқыштар дивизиясы даңғылы бойында Daewoo Nexia автокөлігінің жүргізушісі рөлге ие бола алмай, жолдың қарсы бағытына шығып кетіп, Lada Priora, Opel Vectra көліктерімен түйіскен. Daewoo Nexia оқиға орнында түгі қалмай жанып кетті. Осы көліктің жүргізушісі мен жолаушысы және Lada Priora автокөлігінің жүргізушісі түрлі жарақаттармен облыстық жедел жәрдем ауруханасына жеткізілді. Жарақаттанғандардың біреуі реанимацияда, ал екеуі травмотология бөлімшесінде. Дәрігерлердің айтуынша жансақтау бөлімінде жатқан науқастың жағдайы ауыр.
Осы апаттан кейін қаланың орталық көшелерінде көлік кептелісі болды. 312-ші атқыштар дивизиясы даңғылы бойында қозғалыс баяулап, бұл Тургенев, Маметова көшелерінде және 11-шағын ауданда көлік тығынының қалыптасуына алып келді. Жағдай 2-3 сағаттан кейін ғана түзелді. Таңда кейбір тұрғындар жұмыстарына кешігіп жатты.