2013-жылдың үздік педагогтары Ақтөбеде
 | Ақтөбелік ұстаздар үздіктер сапында. Естеріңізде болса, былтыр облыстың 8 мұғалімі республикалық "Үздік педагог-2013" байқауында топ жарған болатын. Үздік педагогтардың іс-тәжірибелері бүгін тағы қаламызда өткен республикалық семинарда талқыланды. Семинарға еліміздің 14 облысынан ұстаздар келді. Зәмзәгүл Қиябаева - 30 жылдық еңбек тәжірибесі бар ардақты ұстаз. Математика пәнінің мұғалімі байқауда жылдар бойғы еңбегін танытып, ұстаздың биік ұстамынан бұрын, ұстартқан білімінің жоғары деңгейін көрсетіпті. Ұлағатты ұстаз әлі де оқушыларына математиканың қыр-сырын үйретуден жалыққан емес. Шәкірттерін білімімен қоса жылы жүзімен де баурап алған ұлағатты ұстаз сайыста елдің түкпір-түкпірінен жиналған әріптестері арасында топ бастады. Ақтөбе политехникалық колледжінің арнаулы пән оқытушысы Жанат Ходжаниязова 200 балл жинап, ең үздік көрсеткішке қол жеткізді. Ақтөбелік педагогтардың озық тәжірибелері бүгін республиканың әр түпкірінен келген әріптестеріне үлгі ретінде көрсетілді. Былтыр екінші рет ұйымдастырылған "Үздік педагог-2013" республикалық сайысының шешуші сәтіне 169 үміткер қатысқан болатын. Олардың арасында мектеп тәлімгерлері, мектептен тыс ұйымдардың тәрбиешілері, сондай-ақ техникалық және кәсіби білім беру жүйесінің қызметкерлері бар. Білім министрлігінің шешімімен 48 ұстаз «Үздік педагог» атанып, оқ бойы озық шыққандары 1 млн 731 мың теңге көлемінде қомақты қаржыны иеленді. |
«Тәулік» бағдарламасының толық нұсқасын мына сілтемеден қараңыз
Количество показов: 2442
Дата создания: 31.03.2014 18:19:53
