"Жаңатас-Ақтөбе" ЖШС-нің жұмысшылары былтырдан бері жалақыларын ала алмай жүр. Қиыршық тас шығаратын зауыттың қарызы қазір 38 млн. 375 мың теңгеге жеткен. Бұл қаражат 164 жұмысшыға тиесілі. Жалақыларынан күдерін үзген жұмысшылар әлдеқашан тарап кеткен. Ал серіктестікің қазіргі хәлі мүшкіл. Кәсіпорын осы айдың соңында жұмысын тоқтатуы мүмкін.
"Жаңатас-Ақтөбе" ЖШС-нің барлық құқығы биыл жаз айларында "Темір тас 2017" ЖШС-іне ауысқан. Жалақы, салық, несие барлығын енді соңғысы төлейді. Кәсіпорын өкілдерінің сөзінше, 164 қызметкеріне 38 млн. теңге қарыз. «Temir Tas 2017» ЖШС 21 қыркүйекке дейін «Жаңатас-Ақтөбе» серіктестігінің қызметкерлері алдындағы қарызын өтеуге міндетті. Өзара келісе алмаған серіктестіктердің шешімін таппай отырған істері өте көп. Қос серіктестік те қиыршық тас өндірумен айналысады. Былтыр жұмысшыларына жалақы төлемей шу көтерген "Жаңатас-Ақтөбе" ЖШС-нің қазір бар, жоғын ешкім білмейді. Ақпанда жұмысшылары облыс әкімінің орынбасары Қайрат Бекеновтың қабылдауына барған. Сол кезде өңір басшысының орынбасары арнайы комиссия тексеру жүргізіп, инвестормен арадағы келісім-шартты бұзу үшін жұмыс атқарылады деп уәде берген. Арада жарты жыл өтсе де нәтиже болмай тұр. Құзырлы мекемелерден берілген жауап бойынша құзыреттілікті алған "Теміртас-2017" ЖШС-гі барлық қарыздарды 21 қыркүйекке дейін өтемесе, толықтай жабылуы мүмкін. Құжатта келісілгендей соңғы серіктестік жұмысшыларға қарыздарын қайтаруы тиіс. Ал, "Жаңатас-Ақтөбе" ЖШС-гімен арадағы мәселені сот арқылы шешуі қажет.