Өңірде жұмыртқа бағасы арзандады. Жергілікті құс фабрикаларында шығарылатын жұмыртқа ондығының өзіндік құны қаңтар-ақпан айларында 270-290 теңге болды. Бұл өткен жылдың желтоқсан айымен салыстырғанда 30-40 теңгеге арзан. "ADM Investment" құс фабрикасында тәулігіне 500 мыңға жуық жұмыртқа өндіріледі. Бұл өткен жылмен салыстырғанда көбірек көрсеткіш. Құс фабрикасы мамандарының айтуынша, өндіріс көлемі әлі де арта түспек. Себебі, ағымдағы жылы мұндағы құстардың қатары тағы да Ресейден әкелінген балапандармен толығады. Қазіргі таңда құс фабрикасында 720 мың құс бар. Фабрика өнімін экспортқа да шығарады. Мәселен, өткен жылы Ауғанстан мемлекетіне 23 млн жұмыртқа жөнелтілген. Бұл жылдық өнімнің шамамен 15 пайызын құрайды.
Құс фабрикасынан босатылатын жұмыртқа бағасы қаңтар-ақпан айларында арзандаған. Қазір жұмыртқа ондығының өзіндік құны 270-290 теңге. Былтырғы жылдың ақпан айында баға 310-345 теңге шамасында болған. Технолог маманның айтуынша, өнім құнының өзгеруіне құстарға берілетін жем бағасының қымбаттауы тікелей әсер етеді. Жұмыртқаның бағасы өзге азық-түліктерге қарағанда тұрақсыз. Қай уақытта арзандап, қай уақытта құны шарықтап кететінін тұтынушы болжап үлгермейді. Дегенмен, статистика ағымдағы жылдың қаңтар айында еліміздің барлық өңірлерінде жұмыртқа бағасының арзандағанын көрсетті. ҚР Бәсекелестікті қорғау және дамыту агенттігінің мәліметтеріне сүйенсек, жұмыртқаның сатылымдағы бағасы республика бойынша 385 теңге шамасында. Бұл өткен жылдың осы кезеңімен салыстырғанда 3,1% төмен көрсеткіш.