ҚР Үкіметінің қаулысына сәйкес, 2021-2025 жылдары облыста 23 коммуналдық нысан жекешендіріледі. Оның 12-сі биыл жеке меншікке өтпек. Бұлардың ішіндегі ең ірісі Ә. Молдағұлованың халықаралық әуежайы. Қазіргі таңда әуежайдың нарықтық құны 7,3 миллиард теңгені құрайды.
Әуежайды сатуға қатысты барлық жұмыс заңға сәйкес, электронды түрде жүргізіледі. 15 күннен кейін электронды портал алушыны өзі анықтайды. Сатып алушылар 7 миллиард теңгеден жоғары баға беруі керек. Ал аталған нысанға әзірге қызығушылық танытқан адамдар жоқ деді, облыс әкімінің бірінші орынбасары Руслан Хамбаров.
"Тәуелсіз сараптамалық бағалау" ЖШС өткізген бағалау іс-шараларының қорытындысы бойынша, мемлекеттік сатып алу заңына сәйкес, әуежайдың құнын 7 миллиард 320 миллион теңгеге бағаланып отыр. Еске салайық, 2019 жылы Үкіметтің қаулысымен әуежай республикалық меншіктен, облыстың меншігіне өткен болатын. Биыл 1-наурызда құны 5 миллиард 900 миллион теңге болған.
Өткен жылдың қорытындысы бойынша әуежайдың жылдық таза табысы 300 миллион теңге. Нысан өз шығынын өтеп тұр.