Бүгін таңертең Некрасов көшесінің тұрғындары қатарынан екі жол апатының куәсі болды. Алдымен қос көлік түйісіп, жүргізушілер өзара келісіп, тез тарасқан. Жарты сағат өтпей, сол жерде бір-біріне қарама-қарсы бағытта келе жатқан Опель-вектра, Фольксваген Гольф, Хюндай Соната, Жигули мен Ваз-21099 - барлығы бес көлік соқтығысты. Оқиға орнында жүрген көлік иелерінің айтулары бойынша, апатқа жол бойындағы мына бұраннан ағып жатқан су себеп. Көшеге жайылған су түнгі салқыннан мұз болып қатқан. Ал, көктайғақ жолда жүргізушілер көліктерін тежеп үлгермей жатыр. Тоғытылған көліктер бүтін жолдың қозғалысын тежеді. Барар жеріне асыққан өзге жүргізушілер көше ортасына қаңтарылған көліктерді айналып өтіп, үйлерге тақалып жүрді. Шамамен бір сағаттан соң, апат болған жерге жол инспекторлары жетіп, қозғалысты реттеуге кірісті. Көше тұрғындары су жіберіп жатқан бұранның жағдайы жайында "Ақбұлақ" мекемесіне хабар берген. Алайда, апаттың орын алуына сол ғана себепші деп ойламайды олар. Кінә жүргізушілердің өздерінен де бар.