Бауырластар зиратында гранит тақталарды қиратып кеткен бұзақылар ұсталған жоқ. Полиция қызметкерлері қорымға қиянат жасағандарды әлі де іздестіріп жатыр, дейді облыстық ішкі істер департаменті баспасөз қызметінің жетекшісі Алмат Иманғалиев. Ал қиратылған тақталардың орны екі аптадан бері ойсырап тұр. Қалалық әкімдіктің баспасөз хатшысы Лариса Томчуктың айтуынша, оларды қалпына келтіру үшін жергілікті бюджеттен 200 мың теңге бөлініп, жаңасына тапсырыс берілген. 45 жауынгердің есімі қашап жазылатын үш тақта қарашаның біріне дейін дайын болуы тиіс. Естеріңізге сала кетсек, қазанның оны күні белгісіздер Бауырластар зиратындағы жауынгерлердің есімдері тізілген тақтаның үшеуін сындырып кеткен болатын.