Құрбан айт қарсаңында шұғыл медициналық көмек көрсету бекетінің санитарлық автопаркі су жаңа 12 көлікпен толықты. Автокөлік кілттері мен техникалық құжаттары бүгін жүргізушілеріне салтанатпен табыс етілді. Медициналық көмек бекеті 1 жыл ішінде 160 мыңнан астам тұрғынға көмек көрсетеді. Мақсатты жұмсалса, білім мен денсаулық саласына бөлінген қаражаттың қайтарымы мол. Мына қаз-қатар тізіліп тұрған су жаңа көліктер жергілікті бюджеттің 46 миллион 670 мың теңгесіне сатып алынған. Қалада жедел медициналық көмек көрсету бекеті Ағ. Жұбановтар көшесі бойында орналасқан. Ал қосалқы бекет қаланың ескі бөлігінде Алтынсарин көшесінде және бірі Қарғалы ауылында. Алтынсарин көшесіндегі осы бекетке биыл облыстық бюджеттен ақша аударылып, күрделі жөндеу жасалды. Ауласына дейін абаттандырылып, санитарлық автокөліктерге тұрақ салынды. Алдағы уақытта облыста 50 санитарлық көлікке арналған жөндеу базасы, сондай-ақ қала ішінен 3 қосалқы бекетімен жедел жәрдем станциясын салу жоспарда бар. Құрылысты 2014-16 жылдары республикалық бюджеттен қаржыландырылатын басымды инвестициялық жобалар қатарына енгізу ұсынылды.