№6 кәсіптік лицейде он күннен бері жылу жоқ. Қазір Ақтөбе автожол колледжі болып өзгерген оқу орнының студенттері сабақта жаурап отыр. Алайда, колледж басшылығы бірнеше ғимаратқа жалғасқан нысанның бәрі салқын емес, студенттер жылытылатын аудиторияларға ауыстырылды. Сондықтан, сабақтар қалыпты кесте бойынша өтіп жатыр деп ақталуда. Дегенмен, жылы деген аудиторияның өзінде бүгін балалар сырт киімдерін киіп отыр. Директордың әкімшілік және шаруашылық жөніндегі орынбасары Нұрлыбек Хасановтың айтуынша, мұндағы жылу жүйелерінің бір бөлігі үлкен диаметрлі құбырларға ауыстырылғандықтан, жылу әзірге толық таралмай жатыр. Облыстық білім басқармасы қаражат аударысымен-ақ, өзге құбырлардағы ақаулар жөнделіп, білім ордасы бүгін-ертең жылытылатын болады деп сендірді жауапты тұлға.