Қала әкімі өзі оқыған мектепте дауыс берді

Күні кеше елімізде Қазақстан Республикасы Парламент Мәжілісі мен барлық деңгейдегі Мәслихат депутаттарының кезектен тыс сайлауы өтті. Қала әкімі Мұрат Жөребеков дауыс беру үшін А.Байтұрсынов атындағы №24 мектеп-гимназиясындағы №57 сайлау учаскесінде келді. Ол бұрын осы мектепте оқыған екен. Бір себеппен мектеп ішін аралап, балалық кезін еске түсірді. Шаһар басшысы Мұрат Жөребеков тұрғылықты жері бойынша сайлау учаскесіне таңмен жетті. Жаңа басшы Ақтөбенің тумасы. Қалаға қызметпен оралған соң да ол бұрынғы мекенжайын өзгертпегенге ұқсайды. Өйткені осы №24-ші мектеп-гимназияда бұрын оқыған екен.
№57-сайлау учаскесінде 1750 сайлаушы тіркелген. Электорат үшін бар жағдай жасалған. Үміткерлер туралы ақпарат тақтасы тұр. Бірнеше кабина қойылған. Мүмкіндігі шектеулі азаматтар үшін де қолайлы орта жасақталған. Қариялар мен орта буын өкілдері мұндай саяси науқан кезінде өз белсенділіктерін танытып жатады. Бақылаушыларға залда бөлек орын берілген. Сайлау кезіндегі бұл қызметке жастар тартылған. Айта кетейік, қала бойынша жалпы саны 169 сайлау учаскесі жұмыс істеді. Дауыс беру сағат таңғы 7-де басталып, кешкі сағат сегізде аяқталды. 
Количество показов: 837
Дата создания: 20.03.2023 19:15:09