Өз өзін банкрот деп жариялаудың да жауапкершілігі бар

Несие қарызын өтей алмай жүргендерді банкрот деп жариялау борышкерге де екінші деңгейлі банктерге де сабақ болғалы тұр. Банкрот деп танылған адамның одан кейін несие алуы екіталай. Ал екінші деңгейлі банктер бұдан былай несие берерде қарыздың қайтарылатынына толық көз жеткізіп алатын болады. Шарасыз күйдегі борышкерлерді банкрот деп жариялау заңын түсіндіру тобы бүгін Ақтөбеге келді. ҚР Мемлекеттік кірістер комитеті өкілдері заң аясында мәселесін шешкісі келетін облыс тұрғындарымен кездесіп, оларды мазалаған сұрақтарға жауап берді. Қазақстанда екінші деңгейлі банктерден алған несиелерін 1 жылдан астам уақыт бойы төлей алмай жүрген халық саны 1 миллионнан көп. Олардың барлығы бір заңның аясында банкрот деп танылмайды, әрине. Себебі мемлекет басшысы Қасым-Жомарт Тоқаевтың тапсырмасымен әзірленген заңнамада азаматты банкрот деп танудың тетіктері мен талаптары көрсетілген. Өтінім бергендердің қаржылық-материалдық жағдайы егжей-тенжейлі тексерілетін болады. ҚР Мемлекеттік кірістер комитеті берешектермен және дәрменсіз борышкерлермен жұмыс жасау басқармасы басшысының орынбасары Айбол Аманов бастаған жұмыс тобы өңірлерді 3-ші наурызға дейін түгел аралап, осындай ақпараттық-түсіндіру жұмыстарын жүргізіп шығады. 3-ші наурызда заң күшіне енеді. Айта кетейік, банкроттық туралы рәсімнің 3 түрі бар. Олар соттан тыс банкроттық,
сот арқылы банкроттық, төлем қабілеттілігін қалпына келтіру.Барлық рәсім түрі қарыз алушының бастамасымен ғана жүзеге асады. Яғни, банк борышкердің келісімінсіз банкроттыққа өтініш бере алмайды. Банк алдында 5 миллион 520 мың теңгеден аспайтын қарызы бар жеке тұлғаға соттан тыс банкроттық қолданылады.
Азаматтың атында мүлкі болмауы тиіс, қарыз өтемегеніне 1 жылдан астам уақыт өтуі керек. Рәсімінің бұл түріне 5 жылдан астам уақыт қарызын төлей алмаған жеке тұлғалар да жүгіне алады. Сот арқылы банкроттық 5 миллион теңгеден артық қарызы барларға қолданылады. Сот арқылы банкроттық кезінде қарыз алушының мүлкі сатылады. Алайда несие берген ұйым азаматтың жалғыз баспанасын ол кепілде тұрған болса ғана алып қоя алады. Тұрақты кірісі бар азаматтар төлем қабілеттілігін қалпына келтіру рәсімін қолданып, қарызын 5 жылға дейін бөліп төлеу мүмкіндігін иелене алады. Жалғыз шарт – қарыз көлемі борышкер мүлкінің құнынан аспауы тиіс.
Количество показов: 970
Дата создания: 09.02.2023 12:05:59