Ақжар ауылдық округі аумағына енетін шаруа қожалықтарының жағдайын көруге барған А.Бердалин жылыжай кешеніне барып, жұмысының қыр-сырын өз көзімен көрді. Ауыл іргесіндегі ұядай жылыжай кешенінің шаруасын шалқақтатпай, еңбектің ебін біліп, пайда тауып отырған жылыжай кешенінің басшысы Әлім Алмұратов өз шаруасы жайында былай дейді:
- Былтырдан бастап жылыжай кешенін салып, осы шаруамен айналысып жатырмыз. Алғашында аскөк пен ақжелкен ектік. Бірақ жылыжай ішіндегі жылу қысымының аздығынан жуа егуге ауыстық. Алғашында әжептәуір пайда көрдік. Ал қазір бәсекелестер көбейіп, сауда бәсеңдеді. Қазір 35 мың түп гүл ектік. Енді соның 30 мыңы шығады деп күтудеміз. Алдағы уақытта жылыжай кешенін үлкейтіп, қияр, қызанақ өсірсем деген жоспарым бар. 

Жылыжай кешенін аралап көріп, жұмысымен танысқан аудан басшысы А.Бердалин: «- Өте жақсы. Маған ұнады. Дұрыс шаруамен осылай тап-тұйнақтай қылып айналысу керек»,-деді.
Одан кейін А.Бердалин Ақжар ауылдық округіне кіретін шаруа қожалықтарының басшыларының басын қосып, мәдениет үйінде кездесу өткізді. Онда кооператив құру, ауыл шаруашылығымен айналыспай жерін бос ұстап отырған шаруаларға жерін мемлекет меншігіне өткізу, егін салудағы жаңа технологиялар мен мал басын асылдандыру жайын баяндады. Кездесу соңында аудан әкімі ақжарлықтарды жеке сұрақтарымен қабылдады.