Жасы 70- ке жақындап қалған кейуана алғаш рет жеке басын куәландыратын құжат алды. Бұған дейін Лариса Чернышева 35 жыл бұрын берілген КСРО- ның төлқұжатымен жүрген. Құжаты жоқ қария бүгінге дейін зейнетақы да алып көрмепті. 69 жастағы зейнеткер бірінші рет жеке басын куәландыратын құжатқа қол жеткізді. Лариса Чернышева Қазақстан азаматы ретінде алғаш рет куәлік алып отыр. Оның қуанышында шек болмады. Қарттар күніне орай қазан айында жергілікті полиция қызметкерлері оған осындай тосын сый әзірлепті. Куәлікті алуға келген қарияға тәртіп сақшылары азық-түлік салынған екі дорба сыйлық та қосып беріпті. Бәрінен бұрын зейнеткер өзінің бірінші рет жеке басын куәландыратын құжат алғанына мәз. Зейнеткер осы күнге дейін 1974 жылы, осыдан тура 35 жыл бұрын берілген КСРО- ның қызыл паспортымен жүрген. Құжаты ескі болғандықтан ол ауылдан ешқайда шыға алмай қалған екен. Тіпті жасы 70- ке жақындап қалған қария зейнетақы да алмайды. Жеке куәлік алу үшін Лариса Чернышева аймақтық көші-қон қызметі бөліміне барған. Ондағылар зейнеткерден республика азаматы екендігін растайтын анықтама талап еткен. Бірақ, Кеңес Үкіметінен қалған паспортпен ондай анықтама берілмейтін болған. Құжатсыз жүргендерді тізімге алып, рәсімдеу үшін өткен жылдан бері көші- қон қызметі мен атқарушы билік бірігіп арнайы шара өткізе бастағаны белгілі. Осы шара нәтижесінде Лариса Чернышева да жеке куәлікке қол жеткізді.