Президенттік жастар кадрлық резерві жасақтала бастады. Жоғары әкімшілік және саяси лауазымдар босағанда резервтегі жастардың кандидатурасы қаралатын болады. Үміткерлерден өтініш қабылдау 1-қыркүйекте басталды. Айдың соңында аяқталады. Бүгін мемлекеттік қызмет істері департаментінің басшысы резервке тұрудың жолдарын түсіндірді. Резервке 35 жастан аспаған, жоғары білімі бар, еңбек өтілі бес жылдан кем емес жас қабылданады. Үміткердің аты-жөні президенттік резервте бес жыл бойы сақталады. Өтініш беруші жас міндетті түрде өзі жұмыс істейтін мекеменің басшысынан ұсыныс хат тапсыруы тиіс. Бірінші қыркүйектен бері 132 өтініш бекітілген. Оның үшеуі Ақтөбеден. Әділбек Мұқашевтің айтуынша үшеуі де мемлекеттік қызметкер. Олар - Алға ауданы әкімінің орынбасары, Астана ауданы әкімі аппаратының жетекшісі және Әйтеке би аудандық әкімдігінің бас маманы. Өтініш бергендердің арасында мемлекеттік емес компанияларда қызмет ететін жерлестеріміз де болуы мүмкін. Әзір оны біле алмаймыз. Кандидат РКRezerv.kz сайтына тіркеліп, жеке кабинеттегі деректерді толтыруы керек. 12-қазаннан 25-желтоқсанға дейін үміткер бес іріктеу кезеңінен өтеді.