Жастар еліміз көлемінде танылып жүрген бизнес тренерлермен жүздесті. "Махаббат арқылы бизнеске" деп аталған Ғани Абадан мен Жұман Зиненің авторлық тренингіне 500-ге жуық студент жиналған. Қандай да бір идеялар болса қағып алып, кәсіп бастауға құлшынып жүрген жастар мықты спикерлерге сұрақтарын жаудырды. Табысты болу үшін қандай әрекеттер жасау керек екенін сұрап білді. Соңғы статистика бойынша еліміздің әрбір төртінші тұрғыны бизнес бастағысы келеді. Бірақ, неден бастарын білмейді. Өз-өзіне жұмыс істегісі келетіндер жастар. Сондықтан болар ауқымды бизнесті дамытуға арналған оқыту жобалары жетерлік. Сұраныс та бар. "Жас кәсіпкер", "Бастау" бағдарламалары 2017 жылдан бері жемісін беріп келеді. Осы жобамен екі мыңнан аса жас кәсіпкер атанып кетті. Мықты компаниялар дүниеге келген. Бүгінгі бизнес форумға қаладағы ірі жоғары оқу орнының студенттері көптеп қатысты. Биылдан бастап "Атамекен" ұлттық кәсіпкерлер палатасының амбассадоры атанған Ғани Абадан мен өңірдегі ерлерге арналған киімдер желісінің иесі Жұман Зинеден жастар қажетті идеялар сұрады. Әсіресе спикерлер бәсекелестіктен озу жолдары, бизнесті нөлден бастау тақырыбында сөйледі. Қос тренер сенімдірек болу үшін белсенділік танытқан жастарды тәжірибе жинақтау мақсатында өз кәсіптерімен танысуға шақырды. Алда достық қарым-қатынаста болуға ұсыныстарын білдірді.