Бүгін Ақтөбеде "Жас кәсіпкер-2021" форумы өтті. Жастардың форумына қала мен барлық аудандардың 100-ге жуық жас кәсіпкерлері келген. Кәсіптерін дөңгелентіп отырған олардың көпшілігі "Бастау" бизнес жобасы арқылы мемлекеттік грант иеленген. Форум барысында көрме ұйымдастырылды. "Электрондық сауданы дамыту", "Іскерлік келіссөздер жүргізу этикасы" тақырыптарында секциялық жұмыстар жүргізілді. Бүгінгі форумға қатысуға Гүласыл Жұбанова Шалқар ауданынан келген. 27 жастағы кәсіпкер осы ауданда еңбек етеді. "Принцесса Медина" атты жеке кәсіпкерліктің негізін қалаған. Арнайы тапсырыспен көйлек тігеді. Шебер қол иесінің көпшілікке ұнайтын қасиеті бар. Алған тапсырысын келіскен мерзімде орындап береді. Кешіктірмегені үшін де Гүласыл Жұбанованың кәсібі аудан көлемінде мақтаулы. Бекжан Қожымұратовтың есімі Хромтау қаласына таныс. 24 жастағы жас кәсіпкердің қолынан шыққан мына кірпіштер үй тұрғызуға жарап қалған. Сапалы полистирол бетон кірпіштері екі көлемде өндіріліп тұр. Кәсіпкердің жеке цехында тәулігіне 250-300 дана кірпіштер шығады. Кірпіштер өртенбейтін қасиетке ие. Бүгінгі форумда 100-ге жуық кәсіпкер жұмыстарын таныстырды. Тігіншілікті кәсіп еткен арулар үйге арналған бұйымдарын ұсынса, аспаздар ұлттық тағамдар шеруін ұйымдастырған. Кондитерлер түрлі тәттілерін пісіріп әкелген. Шеберлердің қолынан шыққан әдемі нақыштағы бұйымдар көпшіліктің көңілінен шықты.