2-шілдеде кешкі сағат 11-лер шамасында жаңбыр жауып, Қазанғап көшесіндегі №59 үйдің шатырын бүлдірген. Шатырдан кірген судан, электр қалқаншалары атылыпты. Өрт басталған. Төтенше жағдайлар қызметінің мамандары тұрғындарды түнде қауіпсіз жерге шығарып, өртті сөндірген. Дене жарақатын алған ешкім жоқ, дегенмен үй жарықтан ажыратылған.Қазанғап көшесі №59 үйде барлығы 70 пәтер бар. 60-қа жуық пәтердің иелері қажетті 33 мың теңгеден жинап берген. Қол байлау болып отырғандары қалған 10 үй. Ал, алдымен шатыр жөнделмей электр қалқаншалары қозғалмайды. Шатыр жөндеуге жауапты топ жұмыс 10 күннен кейін ғана аяқталады деп отыр. Бұл жұмыстары үшін олар 2 млн. теңгеге жуық ақы сұраған. Оған қоса, баспананың 2-5 қабаттарындағы пәтерлерде салқын су жоқ. Жансұлу Оразованың сөзінше, 5 қабатты үйдің мәселелері біткен емес. Тұрғын үй иесіз де емес. "ИП 16" пәтер иелері кооперативіне қарайды. Дегенмен, тұрғындар жұртта қалғандай күй кешіп жатырмыз дейді. Пәтер иелері кооперативінің төрағасы бүгін жұмыс орнында болмады. Ал, кооператив қызметкері Серік Мұхамбетқазин сұрақтарға жауап беруден бас тартты. Сөзінше, тұрғындарға кооператив тарапынан барлық көмек көрсетіліп жатыр. Баспананың дұрысталуына атсалыспаған тұрғындарға бүгін ескерту қағазы жіберіледі. Орындалмаса, мәселе сот арқылы шешіледі. Электр жарығы үйге 3-4 күннің ішінде берілетін болады.