Жалпыхалықтық референдум Ақтөбеде өз деңгейінде өтті. Дауыс беру учаскелері таңғы сағат 6-да ашылды. 7-ден бастап дауыс берушілерді қабылдады. Бұл күні облыс әкімі Оңдасын Оразалин өз таңдауын жасау үшін № 4-ші мектеп ғимаратында орналасқан №67-ші дауыс беру учаскесіне отбасымен келді. Қала тұрғындары Ата заңға енгізілетін өзгерістер бойынша таңдау жасауға белсенді қатысты. Ақтөбеде 517 референдум учаскесі жұмыс істеді. Облыста дауыс беруге құқылы 560 мыңға жуық ақтөбелік тіркелді. Оның 6 мыңға жуығы кәмелет жасына енді жетіп, бірінші рет таңдау жасады. № 4-ші мектепте екі дауыс беру учаскесі орналасқан. №64-учаскеде 2595 адам, ал №67-учаскеде 2428 адам тіркелген. Әр учаскеге 5 бақылаушы жұмылдырылған. Тұрғындардың дені дауыс беру учаскесіне түске дейін келіп кетті. Облыс әкімі Оңдасын Оразалин ел конститутциясына өзгерістер мен толықтырулар енгізу жөніндегі жалпыхалықтық референдумда отбасымен бірге дауыс берді. Ол дауыс беру учаскелеріне келген азаматтардың барлығына алғысын білдірді. Дауыс беру учаскелерінде түс ауғаннан кейін халық нөпірі саябырсыған. Сол себепті комиссия мүшелері жақын маңда тұратын үйлерден дауыс беруге ниет еткендерге өздері барды. Жалпы өңірдегі 517 учаскенің барлығында көшпелі жәшік бар. Одан бөлек, әрқайсысына инватакси мен аудармашылар да бекітілген. Учаскелер кешкі 20:00-ге дейін жұмыс істеді. Сонымен қатар, референдум учаскелерінде мектеп оқуышалары концерт қойып, әртүрлі сауда орындарының қатысуымен жәрмеңке ұйымдастырылды.
Біздің өңірде 322 мың 549 адам референдумға қатысты. Оның 71,47 пайызы Ата заңдағы өзгерістерді жақтап дауыс берген. Орталық сайлау комиссиясының бүгін таратқан алдын ала мәліметінше, дауыс парақтарының 2,60 пайызы жарамсыз деп танылды. 1,22 пайыз парақ есепке алынбаған.