Жақсының аты өлмейді! Бүгін қаладағы №11-ші жалпы білім беретін мектеп-гимназияда Глеб Щегельскийдің құрметіне мемориалды тақта ашылды. Халық қалаулысы бұл мектепте 1976-1986 жылдар аралығында білім алды. Салтанатты шараға облыс, қала әкімдері, мәслихат хатшылары және депутаттың отбасы қатысты. Есімі елге танымал азамат, Мәжіліс депутаты Глеб Анатольевич Щегельскийдің қайтыс болғанына 40 күн болды. Бүгін жерлестері еске алып, оның құрметіне мемориалды тақта ашылды. Митингке облыс басшысы Оңдасын Оразалин, облыстық мәслихат хатшысы Сәния Қалдығұлова, қала әкімі Асхат Шахаров, қалалық мәслихат хатшысы Сұлупан Шынтасова, Глеб Щегельскийдің ата-анасы, жақындары, №11- мектеп ұжымы және БАҚ өкілдері қатысты. Жиынды алғы сөзбен ашқан өңір басшысы жерлесіміз жайлы жылы лебізін білдіріп, оның облысқа сіңірген еңбегін еске алды.Облыс әкімі Глеб Щегельскийдің қандай іс болмасын шын ниетімен адал орындайтынын атап өтті. Оңдасын Оразалин депутаттың қолдауымен салынған көпір туралы айтып, бұл - адам өміріндегі игі істердің бірі екенін жеткізді. Қала мен облыс үшін Глеб Щегельский аянбай тер төкті. Ол үшін Ақтөбеден артық жер жоқ болатын. Ол өзі өскен қаланың нағыз патриоты еді. Ал жиында көзіне жас алған анасы Наталья Бондровская баласының мектептегі естеліктерімен бөлісті.№11-ші мектеп-гимназияда Глеб Щегельскийдің бауыры Всеволод Щегельский де білім алды. Кейін інісінің балалары осы білім ордасын тәмамдады. Бұл мектеп - Щегельскийлердің екінші үйіне айналған.Шараға жиналғандар мемориалды тақтаға гүл шоқтарын қойды. Айта кетейік, 17 -қазанда Парламент Мәжілісінің депутаты, экология және табиғат пайдалану мәселелері жөніндегі комитеттің төрағасы Глеб Щегельский 51 жасында жүрек талмасынан кенеттен қайтыс болды. Ол "Астанаға 10 жыл", "Нұр Отан", "Қазақстан Республикасы Тәуелсіздігінің 20 жылдығы" медальдерімен, "Құрмет" орденімен марапатталған.