Жүк көлігінің жүргізушісі ерлік жасады. Жол бойында өртене бастаған Камазды ер адам өз басын қатерге тігіп, қауіпсіз аумаққа қарай айдап апарған. Осылайша өзгелерге зиян тигізбей, жағдайды реттей алды. Өткен сенбіде Ақжар-1 ауылында жолда келе жатқан Камаз өртенді. Дереу 112- ге хабарласқан жүргізуші, құтқарушыларды күтпестен әрекет ете бастаған. Ол өз өмірін қатерге тігіп, көлікті қауіпсіз аймаққа айдап әкеткен. Өрт сөндірушілер Камаз Родниковка ауылына жете бергенде келген. Абырой болғанда зардап шеккендер жоқ. Көлікті де құтқарушылар сақтап қалған. Қазір өрттің себебі анықталып жатыр. Алдын ала болжам бойынша ақау көліктің бортынан шыққан болуы мүмкін. Аккумуляторы тұтанған, дейді құтқарушылар. Камаз жүргізушісінің бұл әрекеті желі қолданушыларын тәнті етті. Өзгелердің қауіпсіздігі үшін өз өмірін бәйгеге тіккен азаматқа құтқарушылар да алғыс жаудырды. Ал мынау Мәскеу ауданындағы Черепанов көшесінде болған оқиға. Мансард үйдің күл талқаны шыққан. Өрттің себебі мен шығын көлемі әзір белгісіз. Тағы бір өрт кеше түнде Ғазиза Жұбанова көшесінде орналасқан мейрамханалардың бірінде тіркелді.Қызыл жалынды сөндіруге 12 арнайы техника мен 46 адам жұмылдырылған. Өрт мейрамхананың жазғы терассасынан басталып, үлкен залдың төбесін шарпыған. Өртенген аумақ 25 шаршы метр. Өрттің себебі мен келген шығынды мамандар тексеріп жатыр. Өрттің негізгі себептері-электр құралдарын монтаждау кезінде сақ болмау, техникалық пайдалану ережелерін бұзу, отты қолдануда салғырттық таныту, темекі тұқылдарын кез келген жерге тастау. Өрттің ең көп түрі тұрғын үй секторында тіркеледі, дейді мамандар. Екінші орында көлік өрті тұр.