Облыстық зағиптар және нашар көретін азаматтардың арнаулы кітапханасына биыл 50 жыл толды. Республикалық, облыстық, аудандық арнайы кітапханалардың басшылары қонаққа келіп, "Көпшілік кітапханалардың мүмкіндігі шектеулі жандар үшін қолжетімділігі" атты семинарға қатысты. Іргетасы 1969 жылы қаланған облыстық арнаулы кітапхана көз мүгедектеріне, аудан тұрғындары мен мектеп оқушыларына қызмет көрсетеді. Зағиптардың уақытылы ақпарат алып, білімдерін толықтыруы үшін жағдай жасалған. Дегенмен, мәселе де жоқ емес. Тар әрі ескі ғимаратта жаңа технологияларды енгізу қиындық туғызады. Оған қоса, қазақ тіліндегі әдебиеттер аз. Оқырманға қызмет көрсететін кітапханашылар да санаулы. Штат саны аз. Шараға зағип және нашар көретін азаматтарға арналған республикалық кітапхананың да директоры қатысты. Облысқа қарағанда Алматыдағы кітапханада оқырманға көбірек жағдай жасалған. Мүмкіндік көп. Алайда, дыбысты кітаптар қоры үнемі жаңартылып отыруы қажет. Кітаптарды дыбыстау үшін дыбыстаушылар мен дикторлар жетіспейді. Ал, оларға қойылатын талап жоғары. Қазір облыстық зағиптар және нашар көретін азаматтардың арнаулы кітапханасында 40 мыңнан астам кітап қоры бар. 7 мыңы нүктелі-бедерлі кітап. Тағы 8 мыңға жуығы дыбысты дискілер. Қордағы қалғаны дені сау жандарға арналған жалпақ қаріптегі кітаптар. Кітапхананың 1200-ден көп оқырманы бар.