Облыс бойынша өткен тоғыз айда 130-дан астам адам қызылшамен ауырған. Қыркүйек айының ортасынан бастап өңірде қызылшаға қарсы иммундау науқаны жүріп жатыр. Вакцина 20-29 жас аралығындағы жастарға беріледі. Профилактикалық екпені тұрғындар тұрғылықты жері бойынша тіркелген емханаларда ала алады. Облыс бойынша қызылшаға 130 адам шалдыққан, оның 94-і бала. Инфекцияның одан әрі таралуына жол бермеу мақсатында жалпы вакцинациялау кампаниясы басталды. 40 жасқа дейінгі медицина қызметкерлерінің 95 пайызы екпе алып болған. 9-10 айлық нәрестелерге де берілуі керек. 16-шы қыркүйектен бастап 20 мен 29 жас аралығындағы жастар өз еріктерімен екпе алып жатыр. Облыста осы жастағы 86 мың 521 адам бар. Мамандардың айтуынша, қызылша өте қауіпті ауру. Түрлі асқынуларға әкеп соқтырады. Қызылша қазір жастар арасында бас көтеріп келеді. Көбі аурудың белгілерін желшешек, қызамықпен шатастырып жатады. Ата-ананың салғырттығынан қызылшаға шалдыққан балалардың ішінде екпе алмағандары басым дейді мамандар. Қызылша жұқтырған науқас айналасындағыларға бөртпе пайда болардан төрт күн бұрын және төрт күн өткен соң қауіпті. Бұл сәттерде науқастың оқшау болғаны дұрыс. Қызылшадан кейінгі ісік, пневмония, энцефалит секілді ауруды жұқтыру адам өміріне аса қауіпті. Тіпті өлімге душар етуі мүмкін. Дәрігерлер қызылшаны емдеудің тиімді әдісі жоқ дейді. Одан сақтанудың жалғыз әдісі вакцина ғана.