Әйтеке би көшесіндегі №22 жатақхана тұрғындары біраз күннен бері нәжіс иісіне тұншығып отыр. 64 отбасы тұратын жатақханада кәріз құбыры жарылып, сасық су төменгі қабаттарға жайылған. Тұрғындар сонау 1970 жылы салынған жатақханада мұндай жағдай жиі қайталанатынын айтады. Себеп- төрт қабатты тұрғын-жайдың кей бөлмелері жергілікті әкімдіктің иелігіне өтіп кеткен. Сол бөлмелерде әкімдік есебінен бірнеше айлап тегін тұратын отбасылар онсыз да ескіріп тұрған құбырларға салғырт қарайтын көрінеді. Жұлдыз Мейірханова мән-жайды анықтап келді. Жарты ғасыр бұрын салынған бұл жатақхана апатты жағдайда тұр. Дәлізден аттаған бойда мұрныңа нәжістің иісі келеді. Төрт қабатта әрқайсысы 29 шаршы метрден 64 бөлме бар. Қазір осынша отбасы тұрып жатыр. Бірінші қабаттағы №10 бөлменің иесі Шолпан Ноғаева үш күннен бері нәжіс исі қолқаны қауып, тыныстауға мүмкіндік бермегенін айтады. Жағдайға алаңдаған тұрғындарына жатақхананың шаруашылық жұмыстарына жауапты кондоминиум төрағасы Ақан Қабақбаевтың айтар жауабы белгілі. Кезекті рет кәріз құбыры жарылып отыр. Көп отбасы бас сауғалап отырған жатақхананың кейбір бөлмелерін жергілікті әкімдік иелігіне әлдеқашан алған. Бөлме қалалық әкімдік құзырында болғандықтан мұнда үй кезегінде тұрған адамдар білгілі бір мерзімге тегін қоныстандырылады. Ал олар уақытша баспаналарын күтіп ұстамайтын болып шықты. Салдарынан желінің дәл осы бөлмемен өтіп жатқан бөлігі жиі жарылатын көрінеді. Кондоминиум төрағасының жергілікті әкімдікке өкпесі қара қазандай. Не бөлмені жатақхана құзырына бермейді, не ескірген құбырларды жамап-жасқауға көмектеспейді деп отыр. Тіпті әкімдікпен соттасып та көріпті. Бірақ іс тұрғындар пайдасына шешілмепті. Ал, мәселе бойынша қалалық тұрғын үй қатынастары бөліміне хабарласқанымызда, ондағылар мән-жәйді басқа жаққа бұрды. Соңғы айларда мүлде ашылмаған бөлменің әлегінен сасық иіске тұншыққан тұрғындар бір-екі күн бұрын мына есікті бұзып ашыпты. Тіпті түнгі мезгілде бөлменің терезесін сындырып кетіпті. Жатақхананың қысқы уақытқа дайындығына алаңдап отырған кондоминиум төрағасы Ақан Қабақбаев жергілікті әкімдікке бұл айда екі барып мәселені шеше алмадым деп налыды. Ол қыс айларында кәріз құбыры қатса, жағдайды қалыпқа келтіруге қыруар қаражат керек болатынын айтады. Мұндай қаражатты жинап беруге жатақхана тұрғындарының қалтасы көтермейді.