Әйтеке би ауданындағы Тымабұлақ ауылы мен Басқұдық ауылдық округінің атауларын тарихи атауларына сәйкестендіру мәселесі бүгін облыстық ономастика комиссиясында қаралды. Әдебиетшілер мен мәдениеттанушы, тарихшылардың сөзінше, "Тұма" сөзі "таза бұлақ" деген мағынаны білдіреді. Жоғарыда аталған Тымабұлақ ауылының атауы бүгінде бұрмаланған. "Тұмабұлақ" деген әйтекебиліктердің ұсынысын бүгін комиссия мүшелері бірауыздан қолдады.
Ономастика комиссиясының отырысы онлайн тәртіпте өтті. Осы отырыста Қобда ауданындағы Колинивка ауылдық округінің тарихи атауын қайтару мәселесі де қарастырылуы керек болған. Алайда жергілікті органдар үлгермепті. Облыс әкімінің орынбасары Марат Тоғжанов жауапты мамандарға тұрғындардан немесе өзге жандардан түскен ұсыныс, тілектер уақытылы қаралып, комиссия отырысына жолдануы керектігін ескертті. Комиссия отырысы кезінде жаңа жобалардың тұсаукесері өтті. "Ономастика тынысы" журналы мен "Ақтөбе облысы аумағында кездесетін топонимдер мен антропонимдер сөздігі" оқырмандарға жол тартты. Алғашқысы өңірдегі ономастика саласындағы жұмыстар, өзгертілген атаулар туралы ақпарат береді.
"Ономастика тынысы" журналы үш айда бір рет жарық көреді. Таралымы 100 дана. Ал, "Ақтөбе облысы аумағында кездесетін топонимдер мен антропонимдер сөздігі" 150 данамен жарық көрген.