Үйлері суға кеткен саяжай тұрғындары мемлекеттен баспана сұрайды
Өткен аптада үйлері қызыл судың астында қалған "Қарғалы", "Мұнайшы", "Күншуақ" бау - бақша ұжымдарының тұрғындары бүгін өз наразылықтарын айтуға шықты. 8 күннен бері олимпиада резервтерін даярлау спорт мектебін паналаған зардап шегушілер әкімдіктің құр уәдесінен шаршадық деп отыр. " "Өз үйім - өлең төсегім" деп бекер айтпаған қазақ. Олар әкімдіктен мәселені тез арада шешіп, жаңа баспана беруін сұрайды.Үйлері суға кеткен саяжай тұрғындарының олимпиада резервтерін даярлау спорт мектебін паналап жатқандарына 10 күндей уақыт болған. Қазір орталықта 11 отбасы жан бағып отыр. Олар 30 - шы наурыз күні таңғы бестерде Қарғалы өзенінің тасуы салдарынан үйлерінен қашуға мәжбүр болған. Өздерімен тек құжаттарын алып шыққан.Қарғалы өзені іргесіндегі бау-бақша ұжымдарын 2017 - ші жылы да су шайған. Ол кезде тасыған судың көлемі үйдің іргетасынан асқан. Сол кезде де үйлері жарамсыз болып қалған отбасылар уақытша орындарға орналастырылған болатын. Сонда оларға әкімдік тарапынан тек 35 мың теңгеден біржолғы көмек көрсетілген. Тұрғындар тұруға жарамсыз болып қалған үйлерін өз қаражаттарына қайта қалыпқа келтіруге мәжбүр болды.
Бүгінде олимпиада резервтерін даярлау спорт мектебін паналап жатқан тұрғындар жағдайлары көңіл көншітпейтінін жеткізді. Күнделікті оларға берілетін азық - түліктің өзі жетпейтінін алға тартты. Киім - кешектерін жуып алуға да ешқандай жағдай жасалмаған. Тіпті, балаларының сабаққа бармағанына 10 күндей уақыт болып қалды.
Cу тасқынынан зардап шеккен тұрғындардың арызын айтып, "Алматы" ауданының әкімдігіне хабарластық. Олар қазір шығын көлемін комиссия мүшелері есептеп жатқанын айтты. Бірақ, өзен жағасында орналасқан үйлер бау - бақша ұжымы болып есептелетіндіктен, оларға үй берілмейтінін ашық жеткізді. Комиссия мүшелерінің жұмыстары осы аптада аяқталады.Ал, тұрғындар болса 2017 - ші жылы үйлері суға кеткен кезде әкімдіктен үй де, жер де берілмегендігін айтты. Олар қазір де мәселе ешқандай шешімін таппай, сол сыз тартқан үйімізге қайта ораламыз ба деп, налып отыр.
Количество показов: 642
Дата создания: 05.04.2023 23:56:09
