ВОХР, Махамбет аталып кеткен ауыл тұрғындарының Тұрғындар қалашығы ауданы, Есет батыр көшесіне қатынауы қиындап тұр. Бүгін олар шағымдарын жеткізу үшін теміржолдың бойына жиналды. Бұған дейін олар осы шойын жол бойымен еш кедергісіз әрлі берлі өтіп жүрген. Соңғы тәуліктерде желілік полиция қызметкерлері белгіленбеген жерден өтетін адамдарды ұстап, ескерту жасап жатыр. ВОХР, Махамбет ауылынан Есет батыр көшесі мен Тұрғындар қалашығы ауданындағы №30, №28-ші мектептерге қатынайтын оқушылар мен олардың ата-аналары темір жолдың осы бөлігін төте жол қылып алған. Алайда бұл адам өмірі үшін ас қауіпті аумақ. Темір жол бойы қай уақытта да аса қауіпті аумақ саналған. Желілік полиция қызметкерлері бүгіннен бастап қаңтардың 24-іне дейін шойын жол бойында рейд жұмыстарын жүргізбек. Акция барысында тұрғындарға заңдар мен талаптар түсіндіріліп, ескерту жасалады. Ескертуге құлақ аспаған жағдайда айыппұл салынады. ВОХР, Махамбет ауылы жаққа жолаушылар автобустары қатынамайды. Сондықтан да ауыл тұрғындары өздерінше жол қысқартқысы келеді. Қоғамдық көлік тұрғындарды қажет жеріне жеткізіп тұрса немесе темір жол бойында я жерасты, я жерүсті өткелдері болса адамдар да бастарын қатерге тікпес еді.