Бүгін дүниежүзілік қоршаған ортаны қорғау күні. Осыған орай Сазды ауылының маңында заңсыз қалдықтар тастайтын орында "Таза болса табиғат- аман болар адамзат" атты акция өтті. Тазалық шарасына облыстық экология департаментінің қызметкерлері мен табиғат жанашырлары қатысып, шашылып жатқан қоқысты жинады. Қолдарына дорба алып, әркім тастап кеткен бос бөтелке мен ұшқан қағаздарды жиыстырды. Акцияға қатысушылар күні бойы қала маңындағы осындай заңсыз қоқыс алаңдарында тазалық жұмыстарын жүргізді. Қала бойынша мұндай заңсыз қоқыс үйілген 500-ге жуық орын бар. Табиғат жанашырлары бұл жерлерге кімнің қай кезде қоқыс лақтырып кететінін анықтай алмай отыр. Оларға жылдар бойы жиналған қоқыстың кімге тиесілі екенін білу қиынға соғып тұр. Тұрғындар болса онсыз да экологиясы мәз емес қаланы қолдан бүлдіру нағыз қылмыс деп санайды. Ақтөбеліктер қоқыстан бөлек, қаланы жайлайтын жағымсыз иіс, өзендердің тартылуы сияқты өзекті мәселелерге алаңдайды. Биыл елімізде табиғат қорғау органдарының құрылғанына 32 жыл болды. Аймақта қатты тұрмыстық қалдықтарды бөлек жинау, сұрыптау мен қайта өңдеуді жүзеге асыру бағытындағы жұмыстар қолға алынған. Мәртөк, Қобда, Байғанин, Темір, Ойыл, Ырғыз, Әйтеке би аудандарында тұрмыстық қалдықтар тастайтын полигондар салынбақ.