11 ықшам ауданның тұрғындары мейрамхана құрылысына қарсы. Әз Наурыз көшесіндегі №2 үйдің тұрғындары айналамызға шағын тамақтану орындары толып кеткелі жазда таза ауамен тыныстаудан қалдық деп отыр. Мәселелерін бір жылдан бері көтеріп келе жатқан тұрғындар бүгін тағы наразылыққа шықты. Әз Наурыз көшесіндегі бұл үйде 72 отбасы тұрады. Мәметова көшесімен қиылыстағы тоғыз қабатты үйдің алдынан былтыр құрылыс жұмыстары басталыпты. Әуелі тұрғындардан гүл салонын тұрғызамыз деп рұқсат алған кәсіпкер кейіннен екі қабатты тамақтану орнын тұрғызамыз деп хабарландыру ілген. Шу шығарып, құзырлы орындарға жазған жұртшылық кәсіпкердің бұл жерді бес жылға жалға алып, әкімшілікпен келіскен құжатында "абаттандыру мақсатында" деп көрсеткеніне көз жеткізген. Талапты бұзған кәсіпкердің бастамасы бір жылға тоқтатылады. Дегенмен тұрғындарға бір апта бұрын нысан иесі қайта келіп құрылыс үшін рұқсат алғанын хабарлапты. Қолындағы рұқсат құжатын көрсеткен. Заңды құжатқа шаһардың жаңа басшысы қол қойған. Тұрғындардың мәселесінен қалалық жер қатынастары, сәулет және қала құрылысы бөлімі хабардар. Бөлім басшысы орынбасарының міндетін атқарушы Ербол Мұхамеджанның айтуынша, бұл мекен-жайда жоспар бойынша 370 шаршы метр болатын ойын-сауық орталығы бой көтереді. Үш қабатты ғимаратта мейрамхана, тамақтану орны топтастырылған. Жаны жасыл желекпен көмкеріліп, шағын сквер салынады. Жер аумағы жеке кәсіпкерге бес жылға жалға берілген. Құрылыс жұмыстары жақын күндері басталады. Ешқандай заңға қайшы әрекеттер жасалып жатқан жоқ деп нақтылады. Құзырлы орган кәсіпкердің жоспар бойынша іске кірісіп жатқанын алға тартады. Сондықтан тұрғындардың сотқа жүгінуден басқа амалдары жоқ.